صديقنا المبدع شلش العراقي يوجه، في هذه المقالة، نصيحة لـ(ثولة) رئيس الوزراء، حسب تسميته، ومع اننا نعتقد ان (ثولة) رئيس الوزراء ضالع في الفساد واللصوصية حتى أذنيه، ومع اننا نكرهه فعلاً وقولاً، إلا اننا ننشر نصيحة الصديق شلش العراقي، ففيها أكثر من معنى..
نصيحة لـ (ثولة) رئيس وزراء العراق ابو نورية!
شلش العراقي
نصيحة صادقة لوجه الله.. بس عاد جيب اليسمع..!
في فضيحة صفقة الاسلحة الروسية التي لم تبق وكالة صحفية بالعالم ما شرَّتنا على الحبل.. لا تهمني المليارات الاربعة ونسبة العمولات فيها، فأنا مواطن تدبَّغ جلده على ضياع مئات المليارات..
اللي يهمني هو كيف التفَّت عصابة من الحرامية والنصابين على رئيس وزراء العراق واخذوه مثل المغفل يطبطب على ظهر الطائرات كأنه بياع شراي في سوك الحرامية ؟؟
كيف يُقاد الرئيس التنفيذي الاول في الدولة مثل اطرش بالزفة ثم يكتشف بعد عودته انه كان مضحوكا عليه، والله ما ادري، يجوز هو اثول من كاعه؟؟
اين طاقمه الاداري ومستشاريه وخبراءه؟؟ ام ان هؤلاء كلهم جزء من الصفقة، من خفت لهيج طاقم ومستشارين، عزة الشاهبندر جنه واحد طالع من الكبور بكفاله، مسموم والسم ينكط من حلكه من يحجي، والدباغ الناطق باسم ثولة رئيس الوزراء وجه اصفر مثل الدجاجة البيها ابو ضريج ولا قطرة دم بوجهه شلون عايش بلا دم ما ادري، خوب السنيد وبقية شلة المستشارين كل واحد بصخلة ماسرحه حرامية مع سبق الاصرار والترصد ؟؟
هل شعر (ثولة رئيس الوزراء) بالعار من هذه الفضيحة.. هل استحى من نفسه.. هل فكر بالاستقالة او على الاقل اقالة المقربين منه؟؟
والله اني من يمّي ميت خجل، مدري احنا خطية مدري هو خطية؟! رجال جبير تالي عمره ينحط بهذا الموقف، راح ينشل من ورا هاي المصيبة حتى بداية الشلل بادية عليه حنجه صاير بيه لوفه يمنه جنه ضاربه شرجي، هسه شراح يعدله، مو فضيحة رئيس وزراء وينضرب بنعال حتى ينعدل حنجه!
ابو سروة (يكولون حتى بنتك سرسورة وزوجها مستشارك إلهم ضلع بالفضيحة، كم مليون لاغفين) اي تروح الصفقة فدوة لقندرتك، اني متعاطف وياك وحزين عليك (هسه تطلع ام احمد زوجتك إلها ضلع بالموضوع!!)، شجابك على هاي الورطة الزفرة؟ رجال على نياتك لو كاعد بطويريج وصاير معاون مدير التربية مو اريحلك من هاي اللغوة؟
الدولة ينرادلها رجال اكفاء، والله متمشي بالدفرات ونصائح حسن السنيد.. والله متمشي هيج، نصيحة من شخص ميكرهك وميحبك اترك هاي الوظيفة التعبانة.. فموظف استعلامات ناجح افضل مليون مرة من رئيس وزراء فاشل!
هناك 3 تعليقات:
لا تتعجب اخي شلش فانهم شلة حرامية مع الاثول الهالكي طاح حظهم
كل ما بالسالفه إنو بوتين من إنطاه القائمه. إسمه ما جان أول واحد بيها.
هايه كل السالفه. وإلا ما جان سمعنا ولا درينا بهايه الطركاعه أصلا حالها حال المليارات اللي صارت ببنوك أوربا و أمريكا وغيرها وبالعقارات.
شو وين قوانين غسيل الاموال ودعم الارهاب عن ذوله. شو آني إذا أحول 100 دولار ألف سين وجيم لازم أجاوب ابو الحوالات وأحلف له بالعباس هايه فلوس علمود تصليح المولده!
والله العظيم ان رأس العصابه جواد المالكى ان المبلغ هو دعم خزينة الدعوه بالسحت الحرام لو كان هناك غيرة رجال استقال من منصبه وكشف السراق اين الغيره سرقات باسم الاسلام والاسلام بريئ منهم لهم يوم هذا الشعب العراقى لا ينسى من سرق قوته
إرسال تعليق