قالة بالة برتقالة ...

تصوير بارع للواقع العراقي بلهجة عراقية وبكلمات بسيطة ..

قالة بالة برتقالة ...

الشاعر يحيى العـلاق

نتصالح لو ما نتصالح ؟!!

قالة بالة برتقالة  ...

وأفرض طلعت ما نتصالح

شراح إنسوي بها الحالة ؟!! 

****

معناها نقسم موطنَّه

دولة شيعة ... و دولة سنة

كل واحد يكتب دستوره

وكل واحد جدول أعماله  ...

ونشرع قانون إيفرق

ويكول الما واحد كاله . ..

 ****

 يا ويل السني اليتجرأ

ويصاحب شيعي ويبراله  ...

ويا ويل الشيعي يحن كلبه

ويدك ترميشة لجواله . ..

ولو شافو بالنقال إسمه

إلا يشيلوه بنقالة . ..

****

واللي متزوج من الثاني

يطردها وينكر أطفاله  ...

وتشمل هاي الإجراءات

حتى أرقام السيارات

ماكو لوحة بصرة عراق

وماكو لوحة عراق ديالى . ..

سنة عراق وشيعة عراق

وكل واحد يعرف منواله  ... 

**** 

زوجي و فردي

وطبعأ بإستثناء الكردي

ما نكدر نمنع تجواله .. ..

وممنوع يغنون لداخل

لو يستمعون لمواله . ..

وممنوع نغني إحنه الميمر

لو مرت لمة خيالة . ..

وممنوع بشارع يتلاكن

أم دحام و أم جمالة . .. 

 ****

 كولو هذا اليوم شماله  ...

وكولو فال الله ولا فاله . ..

ليش أتخيل هاي الحالة ؟!! 

**** 

كمت أتخيل هاي الحالة

من شفت الاستاذ إغتاله

واحد ما يوصل لنعاله .. ..

ومن شفت الدكتور إتهجر

وأحتلو بيته النشالة  ...

ومن شفت العالِم متهدد

حاير وين إيشد رحاله .. .. 

**** 

يومية وكالوا نتصالح

والإشكال إنفض إشكاله .. ..

ويوم الثاني تموت أطفال

ويتفجر مسطر عمالة  ...

لو تتفقون و نتصالح

لو نرجع ع القالة بالة .. .. 

قالة بالة برتقالة ....