تأصيل أكاذيب العملاء

سلام الشماع

بين أوراقي القديمة عثرت على هذا الموضوع الذي يؤرخ لكذب الحكومات التي تعاقبت على العراق بعد الاحتلال.. ومع الأسف لم أعثر على اسم كاتبه لكن من الضروري الاطلاع عليه لنعرف أن مولاكو ليس بدعاً بين من جاء على دبابات أمريكا ليدمروا العراق، فجميعهم كاذبون.. غير أن مولاكو بزَّهم جميعاً في كذبه..

 

(دردشة في سيارة كيّا ) جوادر- باب المعظم:

حجي يجلس في المقعد الأمامي (بعد عبور سيطرة تفتيش): والله هاي ما صايرة.. كل هاي السيطرات وماكو فايده. والله انذبحنه، شوكت نرتاح..

• السايق: عمي يا سيطرات كلهم لغافه وملتهين بالبوك..

 • حجية: يمه لحد يحجي عليهم ذوله ولدنا، شيسون اكثر من هذا، واكفين بحلك الموت

 •  حجي آخر: عمي أمريكا أم المصايب، معقوله ماتكدر تكظ الزرقاوي وتخلصنه.

 •  امرأة أربعينية: صولاغ راح يكظهم واحد واحد

• الحجي: إي من دبش !!

• شاب يجلس خلف السايق: صولاغ لو بي خير جان حمه أخوه

• الحجي: اني من اشوف صولاغ وصاحبه الثاني بالتلفزيون اكول اشتغل الجذب. قتلنا والقينا القبض وراح نحط خطة امنية جديدة وراح نسوي وراح نسوي وكل قبض ماكو

•  حجية كاعدة يم الباب: أكلكم يمة، هو صولاغ مو ابن بدرية الخنـّه؟

• الجميع: ههههههههه

• الحجية: لا والله صدك، بدرية بت شناوه رجلها الله يرحمه،هم اسمه صولاغ بس ذاك شويه بي نور محمد مو مثل هذا مجولح.

 • المرأة: لا يمه يا بدرية الخنه.. هذا اجا من ايران متشوفين خلقته الله كالبها. هذا اسمه بيان جبر الزبيدي

•  الحجي: لا اسمه باقر جبر صولاغ

•  واحد من الخلف: لا حجي اسمه باقر جبر الزبيدي

•  الشاب الاول: لا اسمه بيان جبر صولاغ

•  السايق: جمعوا الكروه اخوان

•  الحجي: والله صولاغ شرطي ما اخليه، مو وزير داخلية.. صورة جرجوبة

•  الشاب الاول: يمعود هي ظلت على صولاغ على الاقل احسن من ابو الصحة، ذاك مضمد ما احطه.. جنه علي العيساوي

•  شاب يجلس في الخلف: شبي ابو الصحة؟ ماعاجبك !! لان من التيار الصدري؟

•  الشاب الاول: لاعمي اني شكلت. شوكت جبت طاري التيار الصدري

 • الشاب الثاني: اي دير بالك، مو تكصون بالعالم وتمشون، عبالكم تايها، روح زيّن شعرك عدل واحجي

•  الشاب الاول: نازل بالله نازل (نزل)

 • الحجي: شرد المَغسَول.. لا يا جبان على هل الدكَه، عبالي صدك زلمة

•  الحجية: عمي هسه هو شكال.. راساً حطيت الصدر بالنص.. ماكال شي وانت اكلته وشربته

•  السايق: اخوان اجمعوا الكروه

•  الشاب: لا يطلعون دعايات على التيار الصدري، خل يحترمون نفسهم وينلصمون، مو مزّين حفر وجايني يتنكرز جنه بعيجي.

• الحجي: ما بيها شي بويه.. انتم راح تصيرون بالحكومة، لازم تتحملون حجي الناس.

 • الشاب: حجي انت هم شكلك اتطلع دعايات على التيار، منو كلك الصدر راح يشارك بالحكومة؟

• الحجي: نازل عمي نازل.. انعل ابو هل القسمة (نزل)

 • الحجية: الحجي هم شطح، كال اني واني وبعدين اطاها اللهيب، يمكن منّا للتانكي مال المي محد راح يبقى.

 • الشاب: شنو حضرتج تقلدين؟ عيب حجيه انت مره جبيره ترى والله...

 • الحجية: نازل يمه نازل، هاي شلون طركاعة ( نزلت)

 • السايق: يابه انت بدل متحجي اجمعلنه الكروه الله يخليك

•  الشاب: اني مو (سكن) مال الخلفوك افتهمت، ترى والله احرمك من الشارع.

• السايق: استغفر الله هاي شيخلصها.. بابا انت شبيك، شمتريك من الصبح؟

•  شابة كانت صامتة: اخوان صلوا عل النبي، هاي شبيكم الله غاضب عليكم بس تتناكَرون.

•  الشاب: الله غاضب عليج وعلى الخلفوج، دغطي كذلتج اول مره وبعدين تفلسفي علينه.

•  الشابة: نازل عيني فدوه.. عزا العزاني (نزلت).

• السايق للشاب: اسمع لك ترى انت طوختها، مو عبالك احنا ازواج، ترى هاي سيارتي بخدمة السيّد وكل جمعة اني انقل بيها مصلين للكوفة بدون كروه.

 • الشاب: نازل عيني نازل (نزل)

 • السايق: الكروه اخوان